Serikali kufanya mageuzi ya kimtazamo katika nafasi za uongozi kwa wanawake

Uzinduzi huo umefanyika leo, Juni 25, 2025, jijini Dodoma na kuhudhuriwa na wadau mbalimbali wakiwemo maafisa habari kutoka wizara mbalimbali, wawakilishi wa mashirika ya kiraia, wanafunzi na wanaharakati wa masuala ya kijinsia.

Akizungumza wakati wa uzinduzi huo, Waziri wa Maendeleo ya Jamii, Jinsia, Wanawake na Makundi Maalum, Dk. Dorothy Gwajima amesema kampeni hiyo inalenga pia kuongeza hali ya kujiamini kwa wanawake na wasichana pamoja na kuwawezesha kushiriki katika masomo ya sayansi, teknolojia, uhandisi na hisabati (STEM).

“Hatuna budi kushirikiana kwa pamoja kwani kampeni hii si ya Wizara moja au Serikali pekee, ndiyo maana tumewaalika wadau mbalimbali ili kwa pamoja tujenge jamii yenye usawa wa kijinsia,” amesema Dk. Gwajima.

Ameeleza kuwa kupitia kampeni hiyo, Serikali inatarajia kuona matokeo chanya katika kipindi cha miaka michache ijayo ikiwa ni pamoja na kuongezeka kwa idadi ya wanawake katika nafasi za uongozi, hususan katika sekta ambazo awali zimekuwa zikitawaliwa na wanaume kama vile uhandisi, madini na urubani.

“Uelewa wa jamii kuhusu usawa wa kijinsia utaongezeka, vitendo vya ukatili vitaendelea kupungua na idadi ya wasichana wanaojiunga na masomo ya STEM itaongezeka,” amesema.

Waziri Gwajima ametoa wito kwa washiriki wote wa kampeni hiyo kuhakikisha ujumbe unawafikia walengwa kwa usahihi ili kuijenga jamii yenye uelewa, wanawake jasiri na wasichana wenye uthubutu wa kuchukua mwelekeo wa sayansi na teknolojia kwa maendeleo ya taifa.

Kampeni ya INSPIRE TO LEAD ni sehemu ya jitihada za Serikali na wadau wa maendeleo katika kufikia usawa wa kijinsia na kujenga jamii jumuishi yenye fursa sawa kwa wote.