MOI YASEMA WAGONJWA WENGI WANAOWAHUDUMIA WANA MATATIZO SUGU.

Akizungumza na waandishi wa habari,  Dkt. Tumaini Minja Daktari bingwa wa upasuaji mifupa MOI, amesema kuwa wagonjwa wengi waliowahudumia ni wenye matatizo ya maumivu sugu ya mgongo, magoti, nyonga na mishipa ya fahamu kwa ujumla, ambapo baadhi ni wagonjwa waliowahi kutibiwa MOI na wengine ni wapya waliopata huduma kwa mara ya kwanza wwngine wenyeji wa Dodoma na wanaotokea pembezoni .

“Wagonjwa wengi wanaotufikia ni wa umri kati ya miaka 45 hadi 60, na matatizo yao yanatokana zaidi na changamoto za umri, uzito mkubwa kupita kiasi, pamoja na mitindo ya maisha isiyojumuisha mazoezi ya mwili,” amesema Dkt. Minja.

Ameongeza kuwa magonjwa hayo yanatibika kulingana na hali ya mgonjwa, ambapo wengine huhitaji upasuaji na wengine hutibiwa kwa kutumia dawa au njia mbadala zisizo za upasuaji. Dkt. Minja amesema huduma wanazotoa kwenye maonesho hayo ni pamoja na uchunguzi wa awali, ushauri wa kitabibu na upangaji wa rufaa kwa matibabu zaidi MOI.

Aidha, MOI imejipanga kutoa huduma mahsusi kwa wanamichezo, kwani wengi wao hukumbwa na majeraha ya magoti,na viungo mbalimbali kutokana na shughuli zao.

Amesema kuwa changamoto kubwa kwa wanamichezo wengi ni kutofuata ushauri wa kitaalamu na kuchelewa kufika hospitali hadi hali inapoendelea kuwa mbaya.

“Tunawahamasisha wanamichezo wote kutembelea banda letu hapa Chinangali kwa ajili ya uchunguzi wa awali na kupata ushauri wa kiafya kabla ya majeraha kuwa makubwa. Matibabu si lazima yaanze baada ya maumivu, kinga ni bora zaidi,” amesisitiza.

Dkt. Minja amehitimisha kwa kuwakaribisha wakazi wa Dodoma na wageni wengine kutembelea banda la MOI ili kupata huduma na elimu kuhusu afya ya mifupa, ubongo na mishipa ya fahamu, akibainisha kuwa taasisi hiyo itaendelea kushiriki kikamilifu katika kuimarisha huduma za afya nchini.