WATU WENYE ULEMAVU WAMEPATA UFADHILI KWA AJILI YA KUWAWEZESHA KATIKA MASWALA YA UONGOZI NA KUKUZA DEMOKRASIA.

Ufadhili huo umetolewa na shirika la Abilis Foundation yenye ofisi zake nchini Tanzania, mkoani Arusha.

Akizungumza na waandishi wa habari, Mkurugenzi wa Foundation For Disabilities Hope, Michael Salali, alisema mradi huo unalenga kuwafikia watu 300 wenye ulemavu katika wilaya ya Kondoa.

“Tunaimani mradi huu umekuja kwa wakati muafaka, hasa baada ya uchaguzi mdogo na kuelekea uchaguzi mkuu.

"Tunataka kuwajengea uwezo watu wenye ulemavu kujitokeza kuchagua na kugombea nafasi mbalimbali za uongozi bila kujihisi wanyonge,” alisema Salali.

Hata hivyo Tasisi hiyo imeishukuru Abilis Foundation kwa kufanikisha mradi huo muhimu.

Kwa upande wake Furaha William, Afisa Habari wa taasisi hiyo, alieleza kuwa mradi huo pia unalenga wanawake na wasichana kwa kuwajengea uwezo katika uongozi na ujasiriamali.

Alisisitiza kuwa jamii inapaswa kubadili mtazamo na kuwapa wanawake na watu wenye ulemavu nafasi za kutoa maamuzi.

“Sisi kama Foundation tunataka kuonyesha kuwa wanawake wanaweza kutoa maamuzi makubwa, kama Rais Samia Suluhu Hassan, ambaye ni mfano mzuri wa uongozi bora,” alisema Furaha.

Aidha, alibainisha kuwa walichagua wilaya ya Kondoa kwa sababu imekuwa ikisahaulika katika miradi mingi ya maendeleo.

Mradi huu unatarajiwa kuwa chachu ya mabadiliko ya kijamii kwa kuimarisha ushiriki wa watu wenye ulemavu na wanawake katika uongozi.