MFAHAMU KOCHA MPYA WA YANGA, MWENYE SOKA LA KISELA

Folz alianza kazi ya ukocha nchini Marekani akiwa na klabu ya West Virginia United, kabla ya kuhamia Afrika ambako alipata nafasi ya kuwa kocha msaidizi wa timu ya taifa ya Uganda na pia msaidizi wa klabu ya Pyramids FC ya Misri. Alipopata nafasi ya ukocha mkuu, alianza na klabu ya Bechem United na baadaye Ashanti Gold nchini Ghana. Pia aliwahi kufundisha Township Rollers ya Botswana, Marumo Gallants na AmaZulu za Afrika Kusini, pamoja na klabu ya Horoya AC ya Guinea. Akiwa Marumo Gallants, alijizolea umaarufu kwa kuwa kocha mdogo zaidi kwenye Ligi Kuu ya Afrika Kusini akiwa na miaka 31 tu.

Kabla ya kutua Yanga, Folz alikuwa msaidizi wa kiufundi wa Mamelodi Sundowns na pia alihudumu kama mkurugenzi wa michezo wa klabu ya Olympique Akbou ya Algeria, ambako alisaidia klabu hiyo kuepuka kushuka daraja. Tajiriba yake pana barani Afrika na uwezo wake wa kimfumo, hasa kutumia mbinu ya kisasa ya 4-3-3, inamweka katika nafasi nzuri ya kuiongoza Yanga kuelekea mafanikio makubwa zaidi.

Ujio wa Romain Folz unatazamwa kama sehemu ya mkakati wa Yanga kujiimarisha kwa ajili ya mashindano ya ndani na yale ya kimataifa, hususan Ligi ya Mabingwa Afrika. Uongozi wa Yanga una matumaini kuwa kwa kutumia maarifa ya Folz na uzoefu wake kwenye soka la Afrika, timu hiyo itaendelea kuwa tishio ndani na nje ya Tanzania.

JE UNADHANI KOCHA HUYU MPYA ATAWEZA KUENDELEZA HISTORIA YA YANGA KWA KUCHUKUA MATAJI MFULULIZO?