NECTA:WATAKAOJIHUSISHA NA UDANGANYIFU MTIHANI WA DARASA LA NNE KUCHUKULIWA HATUA.

BARAZA la Mitihani la Tanzania (NECTA),limetangaza rasmi kuanza kwa mtihani wa kujipima wa darasa la nne huku likitoa rai kwa vituo vyote vya mitihani pamoja na wanafunzi kuhakikisha mitahani hiyo inafanywa kwa weledi na nidhamu kwani baraza halitasita kufuta matokea kwa udanganyifu wowote utakaojitokeza katika mitihani hiyo.

Akizungumza na waandishi wa habari leo octoba 21,2025 Jijini Dar es salaam Katibu Mtendaji NECTA, Prof. Said Mohamed, amesema mitihani hiyo inatarajiwa kuanza octoba 22 na 23 ambapo wanafunzi wa darasa la nne wapatao 1,582,140 kutoka shule 20,517  wanatarajiwa kufanya Upimaji wa Kitaifa wa Darasa la Nne, kati yao 5,750 wenye mahitaji maalum, huku kwa mara ya kwanza kutakuwa na chaguzi kwenye masomo matatu, kifaransa, kichina na kiarabu kwa shule 115.

Amesema mwaka huu kuna mabadiliko kwa kuzingatia Sera ya Elimu ya Mwaka 2014 Toleo la 2023 na Mtaala ulioboreshwa, utawezesha shule 115 kufanya masomo yenye lugha ya kigeni kwa chaguzi.

"Mwaka 2024 tulikuwa na masomo sita, sasa tisa, masomo mawili sanaa na mawili sayansi na matano ni lugha. Kati ya hayo matano, mawili ni lugha 'mama' kiingereza na kiswahili, pia tatu zinazoanza mwaka huu ni kiarabu, kichina, kifaransa," alisema Prof. Mohamed na kuongeza:

"Shule 115 ambazo zimesajili kwa mara ya kwanza kusajili kufanya masomo haya, kifaransa, kichina, kiarabu. Kifaransa 48, kiarabu 58 na kichina tisa. Asilimia 50 ya alama zitahesabiwa katika matokeo ya mwanafunzi. Mtaala uliopo ni masomo sita.

"Ila lugha chaguzi yameongeza idadi na kuwa masomo na kuwa tisa, pia yatahesabika kwenye alama za mwanafunzi, hivyo kujumuishwa kwenye matokeo."

Aidha Prof. Mohamed, ameongeza kuwa mwaka huu shule 20,517 zitafanya upimaji huo, huku waliosajiliwa 1,582,140 kati yao wasichana ni 917,850 sawa na asilimia 51.69.

Prof. Mohamed alisema watahiniwa wa upimaji wa lugha ya kiswahili ni wanafunzi 1,485,637 sawa na asilimia 93.27 huku kiingereza ni 106, 503 sawa na asilimia 6.73 kwa wanafunzi ambao huitumia lugha hiyo katika kujifunzia.

"Wapo wanafunzi 5,750 wenye mahitaji maalum kati yao uoni hafifu ni 1,164; wasioona 111; uziwi 1,161; ulemavu wa akili 1,641 na ulemavu wa viungo 1,673.

"Maandalizi kwa ajili Upimaji wa Darasa la Nne yamekamilika, pamoja na kusamabazaa kwa karatasi na nyaraka zote katika halmashauri, manispaa nchini," amebainisha.

Prof. Mohamed amesema wasimamizi wamepewa mafunzo kuhakikiaha vituo vya upimaji vipo salama, kuzuia mianya  yote inayoweza kusababisha kutokea udanganyifu.

"Wanafunzi wenye mahitaji maalum waongezewe muda wa dakika 20, Kwa kila saa Kwa somo la hisabati pia dakika 10 Kwa kila saa kwa masomo mengine, kama mwongozo wa Baraza unavyoelekeza," ameongeza.

Pia, amesema kwamba taarifa zinazoenea hasa mitandaoni kwamba matokeo ya Darasa la Saba Mwaka 2025, yametangazwa si za kweli, na iwapo yakitoka vyombo vya habari vitashirikishwa na pia matokeo hayo rasmi huweka kwenye tovuti rasmi ya NECTA.