BOT YAWATAKA WANANCHI KUKOPA KWENYE TAASISI ZENYE LESENI YA BENKI HIYO.

Benki Kuu ya Tanzania (BoT) imetoa rai kwa wananchi kuacha kukopa kwenye taasisi zisizokuwa na leseni ya benki hiyo ili kukwepa kuumizwa na kutapeliwa pesa zao hasa katika kipindi hiki cha kuwa na taasisi nyingi za mikopo zinazofanya shughuli hizo mtandaoni.

Akizungumza  Novemba,  14 2024 jijini Dar es Salaam kaimu Meneja Huduma Ndogo za Fedha, Dickson Gama wakati akifungua  mafunzo  kwa wahariri na waandishi wa habari kuhusu usimamizi wa mikopo ya mitandaoni amesema  ni jukumu la BoT kusimamia taasisi za fedha hivyo itaendelea kuhakikisha sekta ya fedha inakuwa thabiti, imara na stahimilivu ili kuwawezesha  shughuli za uchumi zinapatikana kwa wakati.

Amesema Banki  Kuu imeandaa semina hiyo kwa wahariri na waandishi  wa habari  lengo ni kwajengea uelewa mzuri zaidi ili waweze kuelimisha umma.

"Ni jukumu  la BoT katika kusimamia huduma Ndogo za fedha nchini  hivyo kwa kutambua umuhimu wa vyombo vya habari kama kiunganishi kati  ya Benki Kuu na jamii ya watanzania  na dunia kwa ujumla tunaamini kupitia mafunzo haya mtaenda kuelimisha umma na kujiepusha na mikopo ya kitapeli,"amesema.

Ameongeza kuwa  semina hiyo ina umuhimu mkubwa kutokana na ongezeko la huduma za utoaji  mikopo mitandaoni  pamoja na changamoto zake.

Gama amesema  katika utekelezaji  wa sheria  na kanuni za huduma ndogo za fedha ni jukumu  lao kama wasimamizi wa sekta  hiyo kuisimamia.

Ameeleza kuwa mikopo ya mitandaoni imekuwa ni sehemu  ya mfumo wa fedha kwani imerahisisha utoaji  wa huduma za mikopo kwa urahisi zaidi  na haraka.

Amesema ukuaji huo  wa haraka umesababisha changamoto  kadhaa ikiwemo  masuala  ya kimaadili, riba kubwa gharama kubwa za mikopo na kukosekana kwa taarifa.

Gama amesema  kutokana na changamoto  hizo wamekuwa mstari wa mbele kutoa elimu  ili kufanya huduma hiyo kuwa na manufaa kwa wananchi  na mtoa  huduma  kuidhinishwa na BoT.

Kwa upande wake Meneja Msaidizi idara ndogo za fedha Marry Ngasa amewataka watanzania kukopa kwa maendeleo lakini pia kuchukua hatua pindi taarifa zao zinapodukuliwa bila ridhaa zao kitendo kinachofanywa na wakopeshaji.

Aidha ameongeza kuwa BoT inaweka utaratibu wa kutoa taarifa kwa umma kupitia kurasa zao za mitandaoni kuhusu taasisi za mikopo zilizo na leseni ili kuwasaidia wananchi kuzitambua.

Sambamba na hayo Ngasa ameongeza kuwa zipo taasisi 55 ambapo wameshirikisha Mamlaka ya mawasiliano Tanzania(TCRA) ili kuzifungua kutoa huduma mtandaoni kwa kushindwa kukidhi vigezo.

"Kuna hatua mbalimbali ambazo tumezichukua ili kudhibiti athari za mikopo ya kidigital ikiwa ni pamoja kutoa elimu ya ukusanyaji wa madeni ambayo inalataza wazi wazi ukusanyaji wa madeni kwa kutumia lugha ya matusi,vitisho na kulipia hivyo tumeweka dawati la malalamiko hapa benki kuu ili kupoa malalamiko hayo pindi yanapojitokeza",Amesema Ngasa.